टी–२० विश्वकपः वार्मअप खेलमा नेपालले युएईलाई ७ विकेटले हरायो, दीपेन्द्र र आरिफको विस्फोटक ब्याटिङ

काठमाडौं । आईसीसी टी–२० विश्वकप अघिको पहिलो अभ्यास खेलमा नेपालले संयुक्त अरब इमिरेट्स (युएई) लाई ७ विकेटले हराएको छ ।

चेन्नईमा गएराति सम्पन्न खेलमा युएईले दिएको १ सय ४६ रनको लक्ष्य नेपालले १७ ओभरमा ३ विकेटको क्षतिमा पूरा गर्‍यो । नेपालको जितमा उपकप्तान दीपेन्द्र सिंह ऐरी र आरिफ शेखले शानदार ब्याटिङ गर्दै १ सय ३ रनको अविजित साझेदारी गरे ।

आरिफ शेखले ३७ बलमा ६१ रन बनाए भने दीपेन्द्र सिंह ऐरीले ३१ बलमा अर्धशतक (५० रन) पूरा गरे । कप्तान रोहित पौडेल १६ रनमा रनआउट भए भने ओपनर आसिफ शेख र अर्का ओपनर कुशल भुर्तेलले समान ८–८ रन बनाए ।

यसअघि टस हारेर पहिला ब्याटिङ गरेको युएईले निर्धारित २० ओभरमा ६ विकेट गुमाउँदै १ सय ४५ रन बनाएको थियो । युएईका एस खानले ३८ रन र एच कौसिकले ३५ रनको योगदान दिए ।

नेपालका लागि बलिङतर्फ सन्दीप लामिछाने र करण केसीले समान २–२ विकेट लिए ।

नेपालले दोस्रो अभ्यास खेल बिहीबार क्यानडासँग खेल्ने तालिका रहेको छ ।