झापामा सुकुम्बासीले सोधे ‘डोजर आउँछ ?’ बालेनले दिए यस्तो जवाफ

झापा ।  काठमाडौँका सुकुम्बासी बस्तीमा डोजर चलाइएको विषयमा उठिरहेको विवादबारे राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ले झापा–५ पुगेर स्पष्टिकरण दिएका छन्।

मंगलबार बिहान शाह झापा निर्वाचन क्षेत्र नं. ५ अन्तर्गत कमल गाउँपालिकाको सुकुम्बासी बस्तीमा पुगेका थिए। त्यहाँ सुकुम्बासी मतदातासँगको भेटघाट र छलफलका क्रममा काठमाडौँमा डोजर चलाइएको विषय उठेपछि उनले आफ्ना धारणा राखेका हुन्।

स्थानीय बासिन्दाले काठमाडौँका सुकुम्बासी बस्तीमा डोजर प्रयोग भएको घटनाले आफूहरूमा पनि त्रास पैदा गरेको भन्दै जिज्ञासा राखेका थिए। काठमाडौँमा सुकुम्बासी विस्थापन गरियो भने त्यसको असर अन्य जिल्लामा पनि पर्न सक्ने आशङ्का उनीहरूको थियो।



त्यसपछि काठमाडौँका निवर्तमान मेयरसमेत रहेका शाहले काठमाडौँको सन्दर्भ झापासँग तुलना गर्न नमिल्ने बताए। उनका अनुसार काठमाडौँमा डोजर चलाइएको भनिएको स्थान खोला किनारको सार्वजनिक जग्गा हो, जहाँ बसोबास गर्ने सुकुम्बासी वर्षायाममा बाढीको उच्च जोखिममा रहने गर्छन्।

‘काठमाडौँको चाहिँ खोला छेउको सार्वजनिक जग्गा हो क्या। खोला छेउमा बसेका उहाँहरूका लागि हो। बाढी आउँदा बस्तीभन्दा माथिसम्म पानी आउँछ। हरेक वर्ष बर्खा लाग्दा असारमै उठाएर अर्को ठाउँ सार्नुपर्छ। हामीले गर्न खोजेको भनेको जोखिममा बस्नुभएका मानिसलाई सेफ ठाउँमा राख्नुपर्‍यो भन्ने हो। तर, त्यसको गलत न्यारेटिभ बनाएर डोजर चलाएको जस्तो देखाइयो। खासमा मान्छेको ज्यान जोगाउने कुरा हो।’

‘पार्टीसँग नजिक भएकाले एउटै जग्गामा दोहोर्‍याएर लालपुर्जा पाउने र जिन्दगीभर नपाएकाले कहिल्यै नपाउने सिस्टम छ। यो सुधार्नैपर्छ,’ खोलाछेउ बाहेकका वास्तविक सुकुम्बासीले त लालपुर्जा पाउनुपर्छ।’

‘शिक्षा निःशुल्क भनेर संविधानमा लेखियो, तर सय प्रतिशत निःशुल्क गर्न बजेट छैन, खल्तीमा पैसा नहुनेले पनि शिक्षा र स्वास्थ्य पाउनुपर्‍यो, खल्तीमा पैसा हुनेले व्यापार गर्न पाउनुपर्‍यो। क्रमशः जानुपर्छ।’

‘प्रदेश संरचनामा न्यून खर्च हुन्छ। तलबमा जाने खर्चले देश डुबेको होइन,‘मन्त्री र सांसदको तलबले यस्तो स्थिति आएको होइन, त्यो पनि एक भ्रम हो।’