अब कुनै आमाको काख नरित्तियोस्ः प्रधानमन्त्री कार्की

काठमाडौं ।  प्रधानमन्त्री सुशीला कार्कीले शहीदहरूको साहस, चेतना र सङ्कल्पकै कारण आज देश परिवर्तनको ऐतिहासिक मोडमा उभिएको बताएकी छन्।

शहीद दिवसका अवसरमा शुक्रबार जारी गरेको शुभकामना सन्देशमा उनले नागरिक स्वतन्त्रता, लोकतन्त्र र न्यायपूर्ण समाजका लागि आफ्नो अमूल्य जीवन अर्पण गर्ने सम्पूर्ण ज्ञात–अज्ञात शहीदहरूप्रति हार्दिक श्रद्धाञ्जली व्यक्त गरेकी हुन्।

प्रधानमन्त्री कार्कीले सन्देशमा भनेकी छन्, ‘उहाँहरूको साहस, चेतना र सङ्कल्पकै कारण आज देश परिवर्तनको ऐतिहासिक मोडमा उभिएको छ। अब कुनै आमाको काख फेरि रित्तिन नपरोस्।’

उनले न्याय, समानता, उत्तरदायी शासन र उज्यालो भविष्यको आशामा उठेको जेन–जी आन्दोलनका क्रममा सहादत प्राप्त वीर योद्धाहरूलाई समेत नमन गरेकी छन्।

सन्देशमा प्रधानमन्त्री कार्कीले शासकीय मूल्य, नैतिकता र नागरिकको सम्मानमा आधारित राज्य निर्माणको दायित्व प्रत्येक शासकले सधैं स्मरणमा राख्नुपर्नेमा जोड दिएकी छन्।