बालेनमाथि देशी-विदेशी शक्तिले ठूलो लगानी गरेको प्रचण्डको आरोप

काठमाडौं। नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहालले राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साहलाई अघि बढाउन देशी–विदेशी शक्तिहरूले ठूलो लगानी गरिरहेको आरोप लगाएका छन् ।

मंगलवार काठमाडौंमा आयोजित नेपाली कम्युनिष्ट पार्टीमा चुरे भावर पार्टी समायोजन कार्यक्रममा बोल्दै दाहालले देशमा विचार, सिद्धान्त, त्याग, तपस्या र बलिदानको आधारमा अघि बढ्ने नेता भन्दा स्टन्ट र लोकप्रियतामा आधारित नेतृत्वलाई बढावा दिइएको बताए।

‘अहिले देशमा विचार, सिद्धान्त, राजनीति, त्याग र तपस्या सम्मान गर्ने, सामाजिक न्याय र भ्रष्टाचार विरोधी अभियान चलाउने, आर्थिक विकासको पक्षमा काम गर्ने भन्दा स्टन्टमार्फत पपुलर हुनेलाई देशी–विदेशी शक्तिहरूले ठूलो लगानी गरिरहेका छन्,’ दाहालले भने।

संयोजक दाहालले मुलुकमा राष्ट्रिय तागत निर्माण गर्न र देश तथा जनताको पक्षमा काम गर्न कम्युनिष्ट तथा बामपन्थी शक्तिहरूबीचको एकता अभियानलाई तिब्रता दिनुपरेको पनि उल्लेख गरे। ‘इतिहास र विचारको सम्मान गर्दै राजनीतिक मूल्य र मान्यतामा आधारित आन्दोलनलाई संगठित गर्नु हाम्रो ऐतिहासिक आवश्यकता हो। यही सोचका साथ नेपाली कम्युनिष्ट पार्टीको निर्माण प्रक्रिया, धुव्रिकरण र एकताको प्रक्रिया अघि बढाइएको हो,’ उनले थपे।